अंधश्रद्धा दुर करण्यासाठी धाडशी उपक्रम
कोपरगाव प्रतिनिधी, दि. ४ : वेदांत हा अवघ्या नऊ वर्षाचा! तो इयत्ता चौथीत शिकतो पण तो धाडशी आहे. या वयात तो समाजसेवा म्हणून दर रविवारी स्मशानभूमीत स्वच्छता करतो. या वर्षी तर त्याचा वाढदिवस स्मशानभूमीत साजरा करण्यात आला. समाजातील लोकांच्या मनातील भुतांची अथवा स्मशानभूमीची भिती घालविण्यासाठी हा उपक्रम राबविण्यात आला. यामुळे परीसरात हा चर्चेचा विषय ठरला आहे.
वेदांत सचिन चांदगुडे हा चासनळी येथील रहिवाशी. सामाजिक उपक्रमात असलेल्या मायभुमी सोशल फाउंडेशनचा तो सर्वात छोटा सदस्य आहे. सुरुवातीला गंमत म्हणून वडिलांसोबत दर रविवारी ग्रामस्वच्छता करण्यासाठी जाणारा वेदांतला सामाजिक कामाचा लळा लागला. प्रथम स्मशानात गेल्यावर तो जराही घाबरला नाही. तेव्हापासुन तो दर रविवारी सुट्टीच्या दिवशी स्मशानभूमीत इतर सदस्यांसोबत स्वच्छता करु लागला.
इतकेच नाही तर मागच्या दिवाळीत स्मशानभूमीत इतरांसोबत त्याने फराळ सेवन करुन लोकांच्या मनातील गैरसमज दुर करण्यासाठी प्रयत्न केला. नुकताच त्याचा वाढदिवस स्मशानभूमीत केक कापून साजरा करण्यात आला. उपस्थित सर्वांनी तेथेच केक सेवन केला. त्याचे वडील सचिन दिलीपराव चांदगुडे यांनी या निमित्ताने दहा वडाच्या झाडाचे रोपण केले. हे वृक्ष वाढविण्याची व संगोपण करण्याची जबाबदारी ग्रामस्त सुकदेव माळी यांनी उचलली.
यावेळी उपस्थित संतोष पऱ्हे , शाम कासार, कैलास माळी, विजय चव्हाणके, बाळासाहेब सैंदाणे, सुनील चांदगुडे, आढाव साहेब, सुरेश आष्टेकर, शांताराम बिरुटे, बबन गाडे, भाऊसाहेब चांदगुडे, प्रथमेश चव्हाणके आदींनी वेदांतला पुढील वाटचालीस शुभेच्छा दिल्या. या अनोख्याव धाडशी उपक्रमाची चासनळी भागात चर्चा आहे.
माझ्या मित्रांना या उपक्रमाची माहिती झाल्यावर त्यांनी माझे कौतुक केले वडीलांच्या सोबत मी असेच सामाजिक काम करणार आहे” – वेदांत चांदगुडे
