पंतप्रधान मोदी यांच्या उपस्थितीत एकतानगरमध्ये संजीवनी सैनिकी स्कूलचा आवाज

कोपरगाव प्रतिनिधी | दि. 30 : देशाच्या एकात्मतेचा संदेश देणाऱ्या राष्ट्रीय एकता दिनाच्या सोहळ्यात आज, ३१ ऑक्टोबर२०२६ रोजी गुजरातमधील एकतानगर येथे संजीवनी सैनिकी स्कूल अँड ज्युनिअर कॉलेजच्या ब्रास बँड पथकाचा शिस्तबद्ध आणि सुरेल नाद घुमणार आहे. पंतप्रधान नरेंद्र मोदी यांच्या उपस्थितीत होणाऱ्या ‘एकता परेड- २०२६’मध्ये सादरीकरण करण्याचा बहुमान संजीवनीच्या विद्यार्थ्यांना मिळाला असून, देशभरातील निवडक शालेय बँड पथकांसोबत गेल्या दहा दिवसांपासून सुरू असलेल्या संयुक्त सरावात या विद्यार्थ्यांनी आपल्या वादनकौशल्याने, शिस्तीने आणि सांघिक समन्वयाने सर्वांचे लक्ष वेधून घेतले आहे.

राष्ट्रीय शालेय बँड स्पर्धेत देशात प्रथम क्रमांक पटकावल्यानंतर मिळालेली ही संधी संजीवनीच्या यशस्वी वाटचालीतील आणखी एक महत्त्वपूर्ण आणि ऐतिहासिक टप्पा ठरत आहे. भारत सरकारच्या गृह मंत्रालयाने ९ सप्टेंबर २०२६ रोजी पाठविलेल्या अधिकृत पत्रानुसार, संजीवनीच्या
ब्रास बँड पथकाची राष्ट्रीय एकता दिनाच्या ‘स्कूल बँड डिस्प्ले’मधील ‘बॉईज ब्रास बँड’ या श्रेणीसाठी निवड झाली आहे. त्यानुसार २१ ऑक्टोबरपासून एकतानगर येथे देशभरातील सहभागी शालेय बँड पथकांसोबत संयुक्त सरावाला सुरुवात झाली. गेल्या दहा दिवसांपासून भारतीय लष्कराच्या पथकांसह अन्य सहभागी पथकांच्या समवेत सुरू असलेल्या या सरावात संजीवनीच्या विद्यार्थ्यांनी वादनातील अचूकता, संचलनातील शिस्त, ताल-लय आणि सांघिक समन्वय यांचा उत्कृष्ट मेळ साधला आहे. राष्ट्रीय स्तरावरील या सामूहिक सरावात विद्यार्थ्यांनी दाखविलेली तयारी आणि आत्मविश्वास यामुळे त्यांचे सादरीकरण विशेष आकर्षणाचा विषय ठरले आहे.

राष्ट्रीय विजेतेपद मिळविणे आणि देशाच्या सर्वोच्च नेतृत्वाच्या उपस्थितीत होणाऱ्या सोहळ्यात सादरीकरणाची संधी मिळविणे, या दोन टप्प्यांमधील प्रवास विद्यार्थ्यांच्या कठोर मेहनतीचा, जिद्दीचा आणि सातत्यपूर्ण सरावाचा आहे. ब्रास बँडचे सादरीकरण हे केवळ संगीतकौशल्याचे प्रदर्शन नसून त्यामागे शारीरिक क्षमता, एकाग्रता, शिस्त, वेळेचे नियोजन, अचूक तालबद्धता आणि प्रत्येक विद्यार्थ्याचा सामूहिक सहभाग महत्त्वाचा असतो. वादनातील प्रत्येक सूर, प्रत्येक ठेका आणि संचलनातील प्रत्येक पाऊल अचूक असावे, यासाठी विद्यार्थ्यांनी अनेक दिवस अथक परिश्रम घेतले. राष्ट्रीय स्तरावरील संयुक्त सरावातही त्यांनी आपली गुणवत्ता टिकवून ठेवत संजीवनीच्या प्रशिक्षणाचा ठसा उमटविला आहे.

या यशस्वी वाटचालीत संस्थेचे विश्वस्त सुमित कोल्हे यांचे प्रोत्साहन व मार्गदर्शन, संगीत शिक्षक महेश गुरव यांचे संगीतविषयक प्रशिक्षण, कल्चरल हेड शुभम जाधव यांचे नियोजन व सहकार्य आणि कॅम्पस को- ऑर्डिनेटर विजय भास्कर यांचे समन्वयात्मक योगदान महत्त्वपूर्ण ठरले आहे. याशिवाय बँड प्रशिक्षकांचे मार्गदर्शन, प्राचार्य कैलास दरेकर यांचे नियोजन आणि शिक्षक व शिक्षकेतर कर्मचाऱ्यांच्या सामूहिक
प्रयत्नांमुळे या पथकाची राष्ट्रीय स्तरापर्यंतची वाटचाल अधिक सक्षम झाली. विद्यार्थ्यांच्या क्षमतेवर विश्वास ठेवून त्यांना योग्य प्रशिक्षण, सातत्यपूर्ण प्रोत्साहन आणि आवश्यक सुविधा उपलब्ध करून देण्याच्या संस्थात्मक प्रयत्नांचे हे फलित आहे.

संस्थेचे अध्यक्ष नितीनदादा कोल्हे आणि मॅनेजिंग ट्रस्टी अमितदादा कोल्हे यांनी राष्ट्रीय स्तरावरील या यशाबद्दल विद्यार्थ्यांचे व मार्गदर्शकांचे अभिनंदन केले असून, पंतप्रधानांच्या उपस्थितीत होणाऱ्या आजच्या सादरीकरणासाठी शुभेच्छा व्यक्त केल्या आहेत. विश्वस्त सुमित कोल्हे हेही विद्यार्थ्यांसोबत एकतानगर येथे उपस्थित असून, त्यांच्या या राष्ट्रीय सादरीकरणासाठी प्रोत्साहन आणि मार्गदर्शन करीत आहेत. विद्यार्थ्यांनी
राष्ट्रीय मंचावर संजीवनीची शिस्त, गुणवत्ता आणि देशभक्तीची परंपरा आपल्या सादरीकरणातून प्रभावीपणे अधोरेखित करावी, अशी अपेक्षा संस्थेच्या पदाधिकाऱ्यांनी व्यक्त केली आहे.

संजीवनी शिक्षण संस्थेची शैक्षणिक वाटचाल केवळ परीक्षांमधील यशापुरती मर्यादित नसून विद्यार्थ्यांमध्ये नेतृत्वगुण, शिस्त, आत्मविश्वास, सांघिक भावना आणि राष्ट्रप्रेम रुजविण्यावर संस्थेचा विशेष भर आहे. सैनिकी शिक्षणाच्या माध्यमातून विद्यार्थ्यांना विविध राष्ट्रीय उपक्रमांमध्ये सहभागी होण्याची आणि स्वतःची क्षमता सिद्ध करण्याची संधी दिली जाते. विशेषतः ग्रामीण, शेतकरी आणि कष्टकरी कुटुंबांतील विद्यार्थ्यांनाही योग्य संधी, मेहनत आणि मार्गदर्शनाच्या बळावर देशाच्या राष्ट्रीय मंचावर आपली गुणवत्ता सिद्ध करता येते, याचे संजीवनीचे ब्रास बँड पथक हे ठळक उदाहरण ठरले आहे.

दिल्लीतील राष्ट्रीय शालेय बँड स्पर्धेतील देशातील प्रथम क्रमांक, त्यानंतर राष्ट्रीय एकता दिनाच्या ‘एकता परेड-२०२६’साठी झालेली निवड आणि गेल्या दहा दिवसांपासून लष्करी व अन्य पथकांसोबत सुरू असलेल्या संयुक्त सरावातील प्रभावी सहभाग, या सर्व टप्प्यांनी संजीवनीच्या यशाला राष्ट्रीय अधिष्ठान प्राप्त करून दिले आहे. आज पंतप्रधान नरेंद्र मोदी यांच्या उपस्थितीत एकतानगरच्या राष्ट्रीय मंचावर संजीवनीचे विद्यार्थी वादन सादर करणार आहेत. त्यांच्या वाद्यांतून उमटणारा हा नाद केवळ संगीताचा आविष्कार नसून मेहनत, जिद्द, शिस्त, योग्य मार्गदर्शन आणि राष्ट्रप्रेमातून साकारलेल्या यशाचा गौरवपूर्ण आविष्कार ठरणार आहे. कोपरगावच्या शैक्षणिक क्षेत्रासाठीच नव्हे, तर महाराष्ट्राच्या शालेय बँड क्षेत्रासाठीही ही अभिमानास्पद कामगिरी आहे.