शेवगाव प्रतिनिधी, दि. २७ : युवकांनी मोबाईलवरचे गेम न खेळता क्रीडांगणावरील खेळ खेळले पाहिजेत. पैशाने शारीरिक क्षमता विकत घेता येणार नाही ती क्रीडांगणावर खेळ खेळूनच मिळते, असे मत एफडीएल शिक्षण संस्थेचे विश्वस्त पृथ्वीसिंह काकडे यांनी केले. चापडगाव माध्य व उच्च माध्यमिक विद्यालयात वार्षिक स्नेहसंमेलन व जिल्हा परिषद प्राथमिक शाळांच्या विविध क्रीडा स्पर्धेचे आयोजन करण्यात आले या प्रसंगी ते बोलत होते.
अध्यक्षस्थानी खो खो पटू सचिन भाकरे होते. यावेळी प्राचार्य अरुण वावरे, पर्यवेक्षक लक्ष्मण गाडे, केंद्रप्रमुख ज्ञानेश्वर जाधव, तुकाराम भगत ,पोपट सूर्यवंशी, अनारकली दळवी, किशोर तेलुरे, शहादेव शिरसाट, राजकुमार शहाणे , पद्माकर खरमाटे, आदी मान्यवर उपस्थित होते.
अध्यक्ष भाकरे यांनी खेळामध्ये विद्यार्थ्यांनी आदर्श निर्माण करावा. खेळात वर्चस्व मिळविले तर उच्च पदे सहज प्राप्त होतात, हा स्वतःचा अनुभव असल्याचे सांगितले. प्राचार्य वावरे म्हणाले, आहार, विहार व झोप या तिन्ही गोष्टीची सांगड जीवनामध्ये अतीमहत्त्वाची आहे. शारीरिक क्षमता खेळातून निर्माण होते तर आहारातून ऊर्जा निर्माण होते. खेळामध्ये नेतृत्व व सांघिक भावना निर्माण होते. प्रा. दादासाहेब ज्योतीक यांनी सुत्रसंचलन केले. आत्माराम झरेकर यांनी आभार मानले.
