कोपरगाव प्रतिनिधी, दि. ३० : रयत शिक्षण संस्थेचे संस्थापक कर्मवीर भाऊराव पाटील यांचे कार्य व शिक्षण सेवेचा वसा निस्वार्थ सेवेतून पुढे चालवितांना सहकार, सामाजिक व राजकीय क्षेत्रात आपल्या कर्तृत्वातून वेगळी ओळख निर्माण करणारे कर्मवीर शंकरराव काळे सहकारी साखर कारखान्याचे संस्थापक, माजी खासदार स्व.कर्मवीर शंकररावजी काळे साहेब यांच्या १३ व्या पुण्यस्मरण निमित्त रविवार (दि.०५) रोजी सकाळी ९.०० वाजता पुष्पांजली कार्यक्रम होणार आहे.
तसेच सकाळी १०.०० ते १२.०० या वेळेत प्रसिद्ध कीर्तनकार ह.भ.प.डॉ. विजयकुमार फड (निवृत्त आय.ए.एस.ऑफिसर) यांच्या सुश्राव्य हरी किर्तनाचा कार्यक्रम कर्मवीर शंकरराव काळे स्मृती उद्यान येथे होणार आहे अशी माहिती कर्मवीर शंकरराव काळे मित्र मंडळाचे अध्यक्ष कारभारी आगवण यांनी दिली आहे.
समाजकारण, शिक्षण, सहकार, सिंचन, कृषी, राजकारण अशा विविध क्षेत्रात आपल्या कार्य कर्तृत्वाचा अतुलनीय ठसा उमटविणारे प्रेरणादायी व्यक्तिमत्त्व कर्मवीर शंकररावजी काळे यांनी ग्रामीण भागातील विकास, शिक्षणाचा प्रसार आणि सहकार चळवळीच्या बळकटीसाठी आपले संपूर्ण आयुष्य वाहून घेतले. त्यांनी रयत शिक्षण संस्थेच्या विस्तारात मोलाची भूमिका बजावून, हजारो विद्यार्थ्यांना शिक्षणाच्या मुख्य प्रवाहात आणले. त्यांच्या कार्याचा सुगंध अविरतपणे दरवळत राहावा यासाठी कर्मवीर शंकरराव काळे मित्र मंडळाचे वतीने याहीवर्षी मा.खा.स्व.कर्मवीर शंकररावजी काळे साहेब यांच्या १३ व्या पुण्यस्मरणाचा कार्यक्रम आयोजित करण्यात आला आहे.
या पुण्यस्मरण कार्यक्रमासाठी माजी आमदार अशोकराव काळे, गौतम बँकेच्या माजी संचालिका सौ.पुष्पाताई काळे, आ.आशुतोष काळे, जिल्हा बँकेच्या माजी संचालिका सौ.चैतालीताई काळे तसेच कारखान्याचे व्हा.चेअरमन, संचालक मंडळ, कर्मवीर शंकरराव काळे मित्र मंडळाचे सर्व सदस्य व विविध संलग्न संस्थांचे चेअरमन, व्हा.चेअरमन,संचालक, पदाधिकारी आदी मान्यवर उपस्थित राहणार आहेत.
या पुण्यस्मरण कार्यक्रमासाठी स्व.कर्मवीर शंकररावजी काळे साहेबांवर व कर्मवीर शंकरराव काळे सहकारी साखर कारखाना, उद्योग समुह व काळे परिवारावर प्रेम करणा-या हितचिंतक, कोपरगाव मतदार संघातील सर्व कार्यकर्त्यांनी तसेच रयत परिवाराने आवर्जून उपस्थित राहावे असे आवाहन कर्मवीर शंकरराव काळे मित्र मंडळाचे उपाध्यक्ष नारायणराव मांजरे यांनी केले आहे.
