कोपरगाव प्रतिनिधी, दि. ३० : कोपरगाव शहराचा सुटलेला पाणी प्रश्न व झालेल्या विकासामुळे कोपरगाव नगरपरीषदेच्या निवडणुकीत पराभव होईल या भीतीपोटी कोपरगाव शहराच्या विकासाशी देणं घेणं नसणाऱ्या विरोधकांनी राष्ट्रवादी कॉंग्रेस पक्षाच्या नगराध्यक्ष व नगरसेवकांची उमेदवारी रद्द करावी यासाठी याचिका दाखल केल्या होत्या. त्याबाबत सुनावणी होवून कोल्हे गटाच्या सर्व याचिका फेटाळून लावत राष्ट्रवादी कॉंग्रेस पक्षाच्या नगराध्यक्ष व नगरसेवकांची उमेदवारी अर्ज वैध ठरविले होते.
न्यायालयाच्या या निर्णय प्रक्रियेत वेळ वाया गेल्यामुळे निवडणूक आयोगाकडून मंगळवार (दि.२) रोजी होणारी निवडणूक पुढे ढकलण्याचे निर्देश दिले आहेत. त्यामुळे विकासात नेहमीच खोडा घालणाऱ्या विरोधकांनी लोकशाहीवरच अविश्वास दाखवत निवडणुकीतही खोडा घातला असून कोल्हे गटाच्या खालच्या पातळीच्या राजकारणाचा आ.आशुतोष काळे यांनी जाहीर निषेध केला आहे.
निवडणूक आयोगाकडून शनिवार (दि.२९) रोजी प्रसिद्धी पत्रक जाहीर करून राज्यात सुरु असलेल्या काही नगरपरिषदांच्या निवडणुका पुढे ढकलण्यात आल्याचे सांगितले आहे. यामध्ये कोपरगाव नगरपरिषद निवडणूकही पुढे ढकलण्यात आली असल्याचे सांगण्यात आले असून त्याबाबत आ.आशुतोष काळे यांनी कोपरगाव शहरातील भारतरत्न डॉ.बाबासाहेब आंबेडकर स्मारक येथे रविवार (दि.३०) रोजी राष्ट्रवादी कॉंग्रेस पक्ष व मित्र पक्षांच्या शेकडो कार्यकर्त्यांच्या उपस्थितीत निषेध सभा घेवून काळ्या फिती लावून व काळे झेंडे दाखवत कोल्हे गटाचा जाहीर निषेध केला. याप्रसंगी आ.आशुतोष काळे बोलत होते.
पुढे बोलतांना ते म्हणाले की, जनतेला वेठीस धरून जनता अडचणीत राहिली पाहिजे आणि जनतेच्या त्या अडचणींवर राजकारण करायचे अशी विरोधकांची वृत्ती आहे. पाच नंबरचा साठवण तलाव पूर्ण होऊ नये म्हणून त्यांनी न्यायालयाची दार ठोठावली त्याबाबत न्यायालयात ३६ तारखा झाल्या. नगरपरिषदेच्या माध्यमातून जी काही विकासाची कामे चालू होती त्या कामांच्या विरोधात ठराव घेऊन त्या कामांनाही न्यायालयात स्थगिती आणली होती. त्याप्रमाणे प्रत्येक चांगल्या कामांना न्यायालयात खोडा घालायचे काम विरोधकांनी केले आहे. कोपरगाव नगरपरिषदेची निवडणूक दोन दिवसांवर आली होती. राष्ट्रवादी कॉंग्रेस पक्षाच्या नगराध्यक्ष आणि नगरसेवक पदाच्या उमेदवारांना कोपरगावकरांचा वाढता प्रतिसाद पाहून विरोधकांना पराभव समोर दिसू लागला होता. जनता आता त्यांच्या बरोबर राहिलेली नाही हे त्यांच्या लक्षात आल्यामुळे त्यांच्या पायाखालची वाळू सरकली नाही तर पायाखालची वाळूच संपली होती.
विरोधकांनी उमेदवारी अर्ज छाननीच्या दिवशी कोणतीही हरकत घेतली नाही. त्याच्या दुसऱ्या दिवशी न्यायालयात अपील दाखल केले आणि उमेदवारी अर्ज रद्द करण्याची मागणी न्यायालयात केली मात्र न्यायालयाने त्यांचा अपील नाकारला. त्यांनी न्यायालयात अपील दाखल केला नसता तर आज कोपरगाव नगरपरिषदेच्या निवडणुका पुढे ढकलल्या नसत्या. जनतेच्या न्यायालयात जाण्याऐवजी आपल्या अधिकाराचा चुकीचा वापर करायचा आणि त्यावर राजकारण करून जनतेला वेठीस धरायचे अशी विरोधकांची प्रवृत्ती असून निवडणूक पुढे ढकलण्याला कोल्हे गट सर्वस्वी जबाबदार असून कोपरगाव राष्ट्र्वादी कॉंग्रेस पक्ष त्याचा जाहीर निषेध करीत असल्याचे सांगत कोपरगाव नगरपरिषदेची निवडणूक ठरल्या प्रमाणे घ्यावी अशी मागणी राज्य निवडणूक आयोगाकडे केली असल्याचे आ.आशुतोष काळे यांनी यावेळी सांगितले.
यावेळी राष्ट्रवादी कॉंग्रेस पक्षाचे नगराध्यक्ष पदाचे उमेदवार काकासाहेब कोयटे म्हणाले की, आ.आशुतोष काळेंच्या विकास कामांमध्ये न्यायालयाच्या मार्गातून अडथळे आणायचे. जनतेसमोर खोटं बोलायचं, खोटं बोल पण रेटून बोल हीच त्यांची नीती आहे हे मी प्रत्येक कॉर्नर सभेत सांगितले आहे. पाच नं.साठवण तलावामुळे कोपरगावकरांना अनेक वर्षानंतर पाणी मिळणार असल्यामुळे कोपरगावकरांना पाणी मिळू नये यासाठी त्यांनी त्याच्याच काही लोकांना न्यायालयात पाठवून पाच नं. साठवण तलावाच्या कामाला स्थगिती आणण्याचा प्रयत्न केला मात्र आ.आशुतोष काळे यांनी तो प्रयत्न हाणून पाडला. त्यामुळे कोपरगावच्या जनतेला जे पाणी २३ दिवसाआड येत होतं ते आता चार दिवसाआड यायला लागले आहे. कोपरगावच्या नगरपालिकेच्या माध्यमातून जे काही विकास कामे आ.आशुतोष काळे करणार होते त्या विकास कामांमध्येही वेळोवेळी न्यायालयाच्या माध्यमातून अडथळे आणण्याचे प्रयत्न विरोधकांकडून करण्यात आले.
बँक रोड, गुरुद्वारा रोड, धारणगाव रोड या महत्वाच्या रस्त्यांचे काम ज्यावेळी सुरू होणार होते त्याहीवेळेस हि कामे न्यायालय प्रक्रियेत अडकवण्याचा प्रयत्न विरोधी पक्षाकडून झालेला आहे. आणि आता लोकशाहीच्या मार्गाने ज्या निवडणुका होत आहेत त्या निवडणुकांमध्ये सुद्धा न्यायालयाच्या माध्यमातून अडचणी आणण्याचा प्रयत्न त्यांनी केला.निवडणूक निर्णय अधिकाऱ्यांनी आमच्या सगळ्या उमेदवारांचे अर्ज वैध ठरवले असतांनाही त्यांनी जिल्हा सत्र न्यायालयात अर्ज रद्द करण्याचे अपील दाखल केले परंतु न्यायालयातही विजय सत्याचाच झाला.
जनतेचा आम्हाला मिळणारा प्रतिसाद पाहता दोन दिवसानंतर राष्ट्रवादी काँग्रेसचा गुलाल निश्चित होता आणि जनतेने त्यावर शिककामोर्तबही केले होते.परंतु विरोधकांच्या अडथळे आणण्याच्या वृत्तीमुळे निवडणूक जरी पुढे ढकलण्यात आल्याचे निवडणूक आयोगाकडून सांगण्यात आले असले तरी आमचा विजय निश्चीत आहे.विरोधकांनी आ.आशुतोष काळेंच्या विकासवाटेवर कितीही काटे टाकण्याचा प्रयत्न केला तरी कोपरगावकरांच्या आशीर्वादाने त्या वाटेवर विकासाचीच फुले उमलणार असल्याचे काकासाहेब कोयटे यांनी यावेळी सांगितले. यावेळी राष्ट्रवादी कॉंग्रेस व मित्र पक्षाचे पदाधिकारी व कार्यकर्ते मोठ्या संख्येने उपस्थित होते.
